بدأت شهرة محمد جمال العاصي في الكرة العربية منتصف العقد الماضي، بعدما برز اسمه أحد أشهر وكلاء اللاعبين في مصر، وارتبط اسم العاصي بالعديد من اللاعبين البارزين في صفوف الأهلي المصري، أبرزهم الحارس محمد الشناوي، والظهير التونسي علي معلول، قبل أن يتجه إلى العمل الإداري، ويتولى منصب المدير التنفيذي مع نادي بيراميدز المصري إبان ملكية المستشار تركي آل الشيخ.
ولم تستمر تجربة العاصي في بيراميدز سوى أشهر قليلة، قبل أن يرحل لخوض تجربة جديدة وفريدة من نوعها، إذ أعلن آل الشيخ في أغسطس 2019 استحواذه على نادي ألميريا، الذي كان يلعب في دوري الدرجة الثانية الإسباني، وفي الشهر نفسه، أعلن الاستعانة بمحمد جمال العاصي في منصب المدير التنفيذي لنادي الأسود..العاصي تحدث في حوار موسع مع “الرياضية” عن الكثير من الملفات والأسرار.
01
كيف كان موسمكم الماضي في الدرجة الثانية؟
الموسم كان غريبًا بعض الشيء، البداية كانت ممتازة، حصلنا على 45 نقطة من أول 20 جولة، في رقم قياسي على الدوري، وكانت الأمور تبدو أنها سهلة وتسير بيسر، لكن فوجئنا بـ 16 حالة إصابة بكورونا بين صفوف الفريق وإصابتي ملاعب، وأهم مهاجمينا النيجيري صادق عمر انضم إلى منتخب بلاده لخوض بطولة إفريقيا في يناير، بعدما نال أول استدعاء له عبر مشاركاته مع ألميريا، تغير الوضع تمامًا وبدأنا نخسر، من الـ 15 نقطة التالية حصلنا على نقطة وحيدة، وتراجعنا إلى المركز الثالث، ثم صعدنا إلى الثاني، ثم حصل السيناريو الدرامي الذي رأيناه في نهاية الموسم، وفزنا باللقب في آخر دقيقتين بعد 42 جولة وبرصيد 81 نقطة.
02
ما أبرز انطباعاتك عن تجربة الصعود إلى الدوري الإسباني الممتاز “لا ليجا”؟
كانت تجربة شاقة عليّ وعلى فريق العمل كله، لأننا جئنا إلى إسبانيا فجأة، بعد بيع نادي بيراميدز حينما وصل عرض جيد للمستشار تركي آل الشيخ، الذي قرر بيعه، ومن ثم سافرنا لمتابعة نادي ألميريا على أساس أن نشتريه السنة التي بعدها، وبعدها آل الشيخ قرر أن نشتري ولا ننتظر سنة ثانية، ونأخد المخاطرة ونبدأ الآن، أهم حاجة إن احنا ما نهبطش، وسبحان الله من أول سنة كنا بننافس أول وتاني لحد دايمًا شهر إبريل وبعدين بنبقى تالت ورابع ونوصل للـ “بلاي أوف”، لكن كانت تجربة صعبة لأن مكانش فيها وقت للتجهيز وللدراسة كفاية، واشتغلنا يعتبر تحت ضغط، يكفي ضغط اللغة، خدت مننا وقت على أن احنا نتعلم الإسباني، ولكن في النهاية الواحد اتعلم فيها حاجات كتيير وفتحتله آفاق جديدة وأسواق جديدة، والحمد لله في النهاية تجربة الصعود دي مثلًا بالنسبة لي شخصيًا إني أصبحت بيها أول مدير تنفيذي ومدير رياضي عربي في الدوري الممتاز الإسباني، دي حاجة محصلتش قبل كدة، وطبعًا إن حققنا بطولة لأول مرة في تاريخ النادي حاجة مميزة جدًا تفضل في ذاكرة الواحد للأبد.
03
ما هو مردود هذا التأهل من الجانب الاقتصادي على النادي؟
طبعًا النادي المداخيل بتاعته حتتغير تمامًا، سواء على التلفزيون، التذاكر أو الرعاة، وكمان حتى بيع اللاعبين حيتيغر تمامًا، وتوقعاتنا إن شاء الله إن احنا ميزانية النادي للسنة الجديدة حتكون ما بين 80 إلى 100 مليون يورو، احنا السنة الماضية كنا 47 مليون يورو في الدرجة الثانية وده كله بالمجهودات الذاتية للنادي سواء عن طريق بيع لاعبين، أو رعاة أو زيادة في النقل التلفزيوني عشان مراكز ألميريا تطورت بعد ما المستشار اشترى النادي، لأنه مش عارف أنت تعرف ولا لأ، لأن في إسبانيا كان ممنوع مالك النادي أنه يضخ فلوس في الكورة، فدي كانت مخليانا زي ما تقول لازم تعتمد على نفسك كشركة وأنت تحاول تزود دخلك ومصادر الدخل ده، وده اللي اشتغلنا عليه وطبعًا الزيادة زي ما أنت شايف حتكون تقريبًا 100 في المئة.
04
اشترى المستشار تركي آل الشيخ النادي بـ 27 مليون يورو شامل تسديد الديون في 2019.. بعد هذه الأعوام كم وصلت القيمة السوقية للنادي؟
لأ، المستشار اشترى النادي بـ 18 مليون يورو، مش 27 وعمل زيادة لرأس المال بـ 30 مليون يورو، وبعد الزيادة دي لاليجا لغت هذا القانون إنك تعمل زيادة رأس مال ويستخدم نسبة منها في الكورة، عشان كدة قلتلك السؤال اللي قبله إنه مبقاش مُتاح لينا من بعد السنة الأولى إن هو يتدخل تمامًا، واضطرينا نعتمد على بيع اللاعبين، قيمة النادي النهاردة الحد الأدنى ليها في تقييمي الشخصي لا تقل عن 150 مليون، هو اشترى النادي بـ 18 مليونًا، وحاليًا القيمة التسويقية للنادي تصل إلى 150 مليون يورو.

05
وكم تصل عوائدكم من النقل التلفزيوني؟
عوائد النقل التلفزيوني في الموسم الجديد، أنت بتاخد 45 مليونًا دي حناخدها السنة دي حتى لا قدر الله في حالة الهبوط، لكن أي حاجة، أي مركز متقدم حنحققه ده الحد الأدنى اللي انت بتاخده، أي مركز حتقدمه في الموسم الجديد حتاخد أزيد من كدة بكتير بس الفرق ده حتاخده + الـ45 مليون بتاعت السنة الجاية، يعني الـ 45 مليون يتوزعوا بالتساوي، بعد كدة تاخد نسبة على مركزك وتكون النسبة دي بناءً عن الموسم اللي قبليه، الفرق الصاعدة بتاخد الـ 45 مليون في الموسم الأول بعد كدة بناءً عالمركز مثلًا بقيت عاشر تصل يمكن لـ 70، السنة اللي جاية تاخد 70 وهكذا.
06
وهل هي مرضية بالنسبة لكم في النادي؟
هي مرضية بالنسبة لنا، ولكن احنا دايمًا المستشار بيسعى للأفضل وللمزيد، هي مرضية الآن ولكن السنة الجاية نتمنى تكون أزيد من كدة بإذن الله.
07
دعنا نتحدث عن التسويق.. حدثني عن تجربتكم؟
احنا عملنا حاجات كتيرة في الوطن العربي، كانت أفكار للمستشار زي البرامج اللي اتعملت، في حاجات اتعملت في مصر وحاجات اتعملت في السعودية، الجوايز اللي كانت بتتعمل، توقعات المباريات، دي طبعًا أفكار أبوناصر كلها، ولكن أنا شايف أنه اتعمل تسويق، ده منعكس عالمتابعة عندنا في حسابات النادي، في شبكات التواصل الاجتماعي، احنا رقم 1 متابعة من مصر، رقم 2 السعودية، رقم 3 إسبانيا، ده يدل على أن كان في تسويق، واعتقد الفترة الجاية إن الاهتمام من مصر ومن السعودية حيزيد أكتر بكتير ومن دول عربية أخرى أيضًا عشان وجود النادي في الدوري الممتاز، إن شاء الله لو النادي حقق مردود كويس ومستوى جيد طبيعي احنا كلنا كعرب بنحس إن مالك النادي سعودي ومسؤول سعودي والإدارة معظمها عرب، مدير تنفيذي مصري، مدير رياضي مصري، فدي حاجة بتحسسنا أن ده نادي يتبعنا كعرب.
08
مشروع ألميريا طموح.. ما هي خططكم المقبلة وخاصة عربيًا؟
خططنا في الوطن العربي كتيرة، منها أكاديميات، منها افتتاح محلات للنادي، ولكن احنا بنشتغل خطوة خطوة، احنا حاليًا خلصنا المرحلة الأولى من الملعب، لأن الأمور في إسبانيا فيها بيروقراطية شوية في القوانين بتاخد وقت كل حاجة، احنا خلصنا الملعب، المرحلة الأولى نفتتحها آخر الشهر يوم 30 يوليو، بعد كدة بإذن الله بنخلص أرض الأكاديمية، وحنكون مع نهاية الموسم ده عندنا الأكاديمية جاهزة، الأكاديمية الجديدة لنادي ألميريا اللي أبوناصر حيعملها، بعد الانتهاء من الأكاديمية عندنا مشاريع تخص الدول العربية عامةً في إن احنا نفتح أكاديميات النادي، وفي السعودية خاصة، وأيضًا محلات النادي عشان نبدأ نزود القاعات الشعبية للنادي في دولنا.
09
وهل لديكم نية للانتشار في الولايات المتحدة وشرق آسيا على غرار الأندية الأوروبية الأخرى؟
احنا عندنا اهتمام بأمريكا والفرع الرئيس، بس الأولوية لينا وللفرع العربي لأن ألميريا كمان ليها رمزية شوية عند العربي غير أنها في الأندلس، ألميريا هي آخر مدينة خرج منها العرب، اسمها اسم عربي وهو “المرايا” واحنا كإدارة النادي وموظفين الأقسام معظمهم عرب، مالك النادي عربي، السوق العربي كاستراتيجية تسويق هو ليه الأولوية عندنا.
10
تركي آل الشيخ مالك النادي غرد عبر حسابه الشخصي.. بأنه يستهدف مواهب عربية.. هل تستهدفون أسماء معينة في السعودية؟
بنستهدف طبعًا بس مش نجوم جاهزين أكتر من مواهب شابة نقدر نساعد في تكوينها لأن هي دي أصلًا استراتيجية ألميريا حتى مع اللاعبين الإسبان والأجانب، نحن نصنع نجوم، مش بنحاول نجيب لاعبين جاهزين وده شفناه في عمر صديق، رمضاني، سامو كوستا، لعيبة كتير جدًا جبناهم مكانش حد يسمع عنهم وقدرنا نطورهم فنيًا ونطورها على مستوى الشخصية والعقلية، ونقدم بيهم منتج كويس نقدر نبيعه بمردود أعلى بكتير من اللي احنا دافعينه، ويساعد النادي في إنه يكبر ويستمر في التطور.
11
ما هو الجديد في صفقات الصيف خاصة بعد الصعود للاليجا؟
بالنسبة للصفقات حاليًا مفيش أي أسماء واضحة بالنسبة للاعبين العرب، لأن معظم المواهب اللي بنتكلم عليها حتيجي تتدرب مع الفرق والمراحل العمرية اللي في سنها، واحنا عندنا الناشئين بيتجمعوا بعد الفريق الأول بفترة لأن الدوري بتاعهم بيبدأ بعد دوري الدرجة الأولى، والتجمع بيكون آخر شهر 7، لكن حتى الآن مفيش أسماء واضحة في هذا الملف.
12
ستلعبون أول مباراة أمام ريال مدريد في الدوري.. كيف تستعدون لها؟
بالنسبة لي اعتقد أن إيجابيات الموضوع أكثر من سلبياته، من الناحية الفنية هما واحنا أو أي فريق أول 5،4 أسابيع مبيكونش وصل للتوب فورم بتاعته، من ناحية تانية أول سنة لينا يكون أول ماتش لينا في ملعبنا مع ريال مدريد تسويقيًا، العالم كله حيتفرج علينا خصوصًا واحنا لسة مفتتحين المرحلة الأولى من الملعب حتكون قبلها بإسبوعين، فدي أفضل دعاية لينا، لكن في النهاية هو بطل مدريد بطل أوروبا وربنا يستر.
13
هل هناك صفقات أخرى غير اللاعبين من الدوري البرتغالي؟

احنا جبنا صفقة واحدة من الدوري البرتغالي، وجبنا لاعب ناشئ من مانشستر يونايتد، وجبنا ظهير من الدوري الفرنسي.
14
بالنسبة إلى استراتيجيتكم.. تريدون المنافسة أو أن يكون الميريا منتج للمواهب ومصدر لها؟
بالنسبة للمنافسة، عشان نكون واقعيين، احنا لما جينا أبوناصر قال احنا حنصعد في 3 سنين وده عشان نكون واقعيين، يعني سنة تتأقلم فيها، سنة تحاول تدخل في المنافسة، والسنة الأخيرة تكون ثبت رجليك وتنافس بجد وتوصل وتحقق حاجة، فدي كانت الفكرة، دلوقتي الفكرة مختلفة، الهدف بتاعنا إن ألميريا يبقى نادي دائم في الدوري الممتاز، نادي يكون بيقعد بشكل مرتاح في نص الجدول مش بينافس عالهبوط في الأسابيع الأخيرة وبعد ما ده يتحقق حنبدأ نبص للي بعد كدة اللي هو احنا نحاول نوصل لأوروبا، المنافسة عالدوري الإسباني الممتاز صعبة شويتين.
15
محمد.. أنت تعمل مع المستشار تركي آل الشيخ وهو شخصي حماسي وسريع؟
المستشار شخصية حماسية وسريعة، ولكن في الوقت نفسه عقلاني وبيوزن الأمور صح، هو يمكن سريع لأن هو بيبقى عايز ينجز حاجات كتير، وعايز يسابق الوقت، بس أهم حاجة دايمًا عند المستشار إن سباقه للوقت ده مبيجيش على حساب الجودة، الحاجة تتعمل بسرعة آه مظبوط، لكن الحاجة لو ما اتعملتش بأجود حاجة مش حيفيدك انك عملتها بسرعة، لازم تتعمل بأحسن جودة وأحسن المعايير، وأنا يمكن اتعملت منه حاجات كتير، ازاي الواحد يستغل الوقت ويعمل حاجات أكتر بكتير مما كان متخيل يعملها، وإنك إزاي تشتغل تحت ضغط من غير الضعط ده ما يأثر على قراراتك ولا يأثر على حياتك الشخصية، وأنا مرة تانية وتالتة ورابعة بأشكره، عملنا شغل جيد جدًا في بيراميدز بس في النهاية دي إسبانيا، وأنا مكانش عندي خبرة في إسبانيا زي ما قلتلك مكنتش بأتكلم اللغة، أي مستثمر مكانه مكانش عمره حيجيب واحد مصري يديرله النادي فأنا بأشكره على الثقة دي، أتمنى أن الصعود ولقب الدوري اللي خدناه يكون رد ولو حاجة بسيطة من جمايله، ونوعده بأكتر من كدة في المستقبل إن شاء الله.
16
أبو ناصر رجل لا يقبل الخسارة وسبق أن عمل تحقيق أيام ملكية نادي بيرامديز بسبب خسارة.. هل مررتم بهذه الظروف مع ألميريا؟
مظبوط، بس في نفس الوقت في منطق، مش أنه مبيقبلش الخسارة ومفيش أسباب منطقية، هو بيكون عنده دايمًا أسباب منطقية لعدم تقبل الخسارة، النهاردة لما هو يوفرلك كل الأدوات من حقه لا يتقبل الخسارة، وفرلك الإمكانيات، وفرلك اللعيبة اللي انت محتاجها، معندكش حجة زي ما بيقولوا، بالعكس، بعدين أنا كمان نفس الشخصية بتاعته، مبحبش الخسارة ولا الفشل، ودي يمكن كانت أول مشكلة عندنا في الثقافة الأوروبية لأنها مختلفة تمامًا عننا كعرب، هما ممكن يخسروا وييجوا تاني يوم عادي مفيش حاجة حصلت، احنا مثلًا بنقعد الأسبوع كله متضايقين لحد ما نكسب
ماتش تاني، فيمكن احنا وصلنا في ألميريا لحل وسط فرق ما بينا وبين العقلية الإسبانية في الكورة تحديدًا، لكن أنا معاه انه لا يتقبل الخسارة طالما إن أدوات النجاح موجودة.
17
بالعودة إلى اقتصاديات النادي.. مؤشر النادي وأسهمه هل زادت وكم وصلت الآن؟
مؤشر النادي غير مدرج في البورصة، هي شركة مساهمة، بس غير مدرجة، هو البيزيد تقييم الشركة أول شيء كرخصة للشركة زادت أضعاف بسبب الصعود والمداخيل المترتبة عليه، أيضًا أصول النادى من لاعبين أو أراض أو مبانٍ، و كل ده تضاعف في ألميريا نقدر نقول ألميريا زادت قيمته أكثر من ثلاثة أضعاف ما تم اسثماره من المستشار على أقل تقدير.
18
يلاحظ عليكم التركيز في التسويق على السعودية ومصر لماذا؟
التسويق في مصر والسعودية موجود من أول يوم ومستمر وأيضًا دول عربية أخرى لأن ألميريا يعتبر ممثل العرب في الدوري الإسباني وأغلب متابعي الناديي على شبكات التواصل من مصر والسعودية.
19
هل سيكون هناك أكاديميات للنادي في دول عربية؟
سنتتهى هذا العام من المرحلة الأولى من الأكاديمية الجديدة الخاصة بالنادى، وأيضًا انتهينا بعد العام الأول من وضع المنهجية الخاصة بالنادي في تدريب الناشئين، وبدأنا بيها منذ عامين وحققنا تطور ملحوظ في نتائج الناشئين وفزنا هذا الموسم لدوري الـ 19 سنة لأول مرة دوري إقليم الأندلس، ينقصنا فقط البنية التحتية من ملاعب ومباني ستكون جاهزة في شهر مارس إن شاء الله، ومن ثم سنتسوع في الدول العربية وسنطبق نفس المعايير والمنهجية المستخدمة في إسبانيا.
20
ملعب النادي.. ما هو الجديد فيه؟
ملعب المدينة ، النادي استطاع أن يستحوذ عليه كحق انتفاع 25 عامًا وعملنا خطة من مرحلتين الأولى تجديد الإضاءة والشكل الخارجي، وبناء boxes، وغرف الملابس والمكاتب وكل شيء، وسيتم افتتاح المرحلة الأولى 30/7/2022، المرحلة الثانية هتكون حفر الملعب 11 مترًا وزيادة سعة الملعب من 15 ألفًا الآن إلى 25 ألفًا، وهذه المرحلة سيتم البدء فيها خلال عام لعامين أقصى تقدير لأنها تحتاج إغلاق الملعب 6 شهور على الأقل.
21
أخيرا.. رسالتك إلى جماهير الميريا في السعودية والوطن العربي؟
رسالتي لجميع ألميريا في إسبانيا والوطن العربي إننا بإذن الله نشرفكم، ونكون عند حسن ظنكم، وننتظر منكم الدعم، وأن تشرفونا في الملعب